Мазкур "Тарихий хотира беқиёс" китобининг иккинчи жилди Ўзбекистон Республикаси прокуратураси тарихида катағон йилларида ноҳақ судланган, ўлим жазосига маҳкум этилган ва ишдан бўшатилган, туҳмат курбони бўлган прокуратура ходимлари ҳақидаги маълумотларни архив манбалари, тегишли ҳужжатлар орқали ўрганиш асосида яратилган бўлиб, мустабид тузум даврида қатағон қилинган аждодларимиз хотирасини абадийлаштириш, уларнинг фаолияти ва меросини ўрганиш, уни тарғиб қилиш, шу орқали Ўзбекистон Республикаси прокуратураси органларининг ҳақиқий тарихини тиклаш ва кенг жамоатчилик, айниқса, ёшлар эътиборига асосли ҳамда тўлақонли етказиш, фукароларда прокуратура органларининг шарафли фаолияти ҳақидаги тасаввурларини янада бойитиш, ёш мутахассисларда ғурур ва ифтихор туйғуларини кучайтиришга хизмат қилади. Китобни тайёрлашда Ўзбекистон Республикаси Президенти Администрацияси архиви, Ўзбекистон Республикаси Давлат хавфсизлик хизмати архиви, Ўзбекистон Республикаси Ички ишлар вазирлиги Ахборот-ресурс маркази, Ўзбекистон Миллий архиви, Ўзбекистон Республикаси давлат архиви вилоят бошқармалари махфий фондлари. Ўзбекистон Республикаси Президенти ҳузуридаги Стратегик ва минтақалараро тадқиқотлар институти архиви, Ўзбекистон Республикаси Бош прокуратураси архиви, Ўзбекистон миллий кутубхонаси, Ўзбекистон миллий телерадиокомпанияси, прокуратура органлари фахрийлари ва қатағон қилинган прокуратура ходимларининг авлодлари томонидан тақдим этилган маълумот ва ҳужжатлардан фойдаланилди.