Fuqarolik jamiyati institutlari tizimida o'zini o'zi boshqarish organlari (mahalla)ning o'rni beqiyosdir. Ko'pchilik mamlakatlardan farqli o'laroq, mahalla instituti yurtimizda ming yillar davomida sinalgan va chuqur ildiz otgan, aholini birlashtirib turadigan ijtimoiy hodisa sifatida rivojlanib kelmoqda. Ayniqsa, uning hozirgi bozor iqtisodiyotiga o'tish sharoitida xalqimizning urf-odatlari, an'analari va qadriyatlarini saqlab qolish, ularni jipslashtirish kafolati sifatida maydonga chiqayotganligini yaqqol ko'rib turibmiz. Ushbu o'quv qo'llanma oliy o'quv yurtlari talabalari uchun o'quv dasturi va mavzular rejasi asosida tayyorlangan bo'lib, o'quvchilarning o'zini o'zi boshqarish organlari to'g'risidagi bilim va ko'nikmalarini shakllantirishga moʻljallangan.